தமிழ் சிந்தனையாளர் சங்கமம்

தமிழ் சிந்தனையாளர் சங்கமம்
பதினொன்றாம் அமர்வு
இடம்: டோம்பிவிலி ஜோன்தலே உயர்நிலைப்பள்ளி,டோம்பிவிலி
காலம்:2 ,அக்டோபர் , 2011 ஞாயிற்றுக்கிழமை, மாலை 6.30 மணிக்கு

சிறப்பு சொற்பொழிவு:
மக்கள் தொகை கணக்கெடுப்பும் தமிழகமும்
முனைவர் ம.வி வைத்தியலிங்கம்
மும்பை


வரவேற்புரை: அனந்த கிருஷ்ணன்
நன்றியுரை: காரை ரவீந்திரன்

தமிழ் ஆர்வலர்கள் அனைவரும் இதில் கலந்து கொள்ளுமாறு கேட்டுக்கொள்ளுகிறோம்

ராஜா வாயிஸ்
அமைப்பாளர், தமிழ் சிந்தனையாளர் சங்கமம்

தமிழ் சிந்தனையாளர் சங்கமம் எட்டாம் அமர்வு

தமிழ் சிந்தனையாளர் சங்கமம்
எட்டாம் அமர்வு
இடம்: நவிமும்பை தமிழ் சங்கம், வாஷி
காலம்: 3, ஜூலை , 2011 ஞாயிற்றுக்கிழமை, மாலை 6.45 மணிக்கு

சிறப்பு சொற்பொழிவு:
இலங்கை போர்க்குற்றம் பற்றிய
ஐநா அறிக்கை

குமணராசன்- மும்பை
ஆசிரியர்- இலெமுரியா மாத இதழ்


வரவேற்புரை: இராஜகோபாலன்
நன்றியுரை: ஸ்ரீதர்

தமிழ் ஆர்வலர்கள் அனைவரும் இதில் கலந்து கொள்ளுமாறு கேட்டுக்கொள்ளுகிறோம்

ராஜா வாயிஸ்
அமைப்பாளர், தமிழ் சிந்தனையாளர் சங்கமம்

தமிழ் சிந்தனையாளர் சங்கமம்

தமிழ் சிந்தனையாளர் சங்கமம்
ஆறாம் அமர்வு
இடம்: தி மைசூர் அசோசியேஷன் ஹால், முதல் மாடி, மாதுங்கா
காலம்: 1,மே , 2011 ஞாயிற்றுக்கிழமை, மாலை 6.45 மணிக்கு

சிறப்பு சொற்பொழிவு:
இதிகாசங்களும் கதாபாத்திரங்களும்
டாக்டர். திலீப் ஜவேரி
பிரபல குஜராத்தி எழுத்தாளர் மற்றும் சிந்தனையாளர்


வரவேற்புரை: ரவிப்பிள்ளை
நன்றியுரை: கவிஞர் குணா

தமிழ் ஆர்வலர்கள் அனைவரும் இதில் கலந்து கொள்ளுமாறு கேட்டுக்கொள்ளுகிறோம்

ராஜா வாயிஸ்
அமைப்பாளர், தமிழ் சிந்தனையாளர் சங்கமம்

தமிழ் சிந்தனையாளர்கள் சங்கமம்

தமிழ் சிந்தனையாளர்கள் சங்கமம்
மூன்றாம் அமர்வு

இடம்: மும்பை பரவர் சங்கம், மாதூங்கா லேபர்கேம்ப்
காலம்: 6, பிப்ரவரி, 2011 ஞாயிற்றுக்கிழமை, மாலை 6.30 மணிக்கு

சிறப்பு சொற்பொழிவு:
உடல், மொழி மற்றும் சந்தை:
இன்றைய தமிழ் ஊடகங்களும் பெண்களும்

எழுத்தாளர் அம்பை

வரவேற்புரை: கவிஞர் குணா
நன்றியுரை: பென்னட் ஃபர்னாண்டோ

தமிழ் ஆர்வலர்கள் அனைவரும் இதில் கலந்து கொள்ளுமாறு கேட்டுக்கொள்ளுகிறோம்

ராஜா வாயிஸ்
அமைப்பாளர், தமிழ் சிந்தனையாளர்கள் சங்கமம்

தமிழ் சிந்தனையாளர்கள் சங்கமம்

தமிழ் சிந்தனையாளர்கள் சங்கமம்

இரண்டாம் அமர்வு

நாள்: 02.01.2011, ஞாயிறு, மாலை: 6.30
இடம்: மும்பை பரவர் சங்கம், மும்பை
ஈழம் இனி... - சிறப்புரை
திரு. அரிமாவளவன்
பொதுச் செயலாளர் - தமிழர்களம்

வரவேற்புரை: பேராசிரியர் சமீரா மீரான்
நன்றியுரை: கராத்தே முருகன்

தமிழ் ஆர்வலர்கள் அனைவரும்
இதில் கலந்து கொள்ளும்படி கேட்டுகொள்கிறோம்

ராஜா வாயிஸ் – அமைப்பாளர்
தமிழ் சிந்தனையாளர்கள் சங்கமம்

தமிழ் சிந்தனையாளர்கள் சங்கமம் - மாதாந்திர அமர்வு

தமிழ் சிந்தனையாளர்கள் சங்கமம்
மாதாந்திர அமர்வு

நாள்: 05, டிசம்பர் , 2010 ஞாயிற்றுக்கிழமை நேரம்: சரியாக மாலை 6.00- 800

இடம்: மும்பை பரவர் சங்கம், டி/ 13- 8, லேபர்கேம்ப், மும்பை-19

சோழர்களும் தமிழும்

சிறப்புரை: கவிதாயினி புதிய மாதவி

தமிழ் ஆர்வலர்கள் அனைவரும் இதில் கலந்து கொள்ள வேண்டுகிறோம்.

திரு. ராஜா வாயிஸ்
அமைப்பாளர், தமிழ் சிந்தனையாளர்கள் சங்கமம்

‘எதையும் தாங்கும் இமயம் அண்ணா’ நூல் அறிமுக விழா

லிட்டோரல் கம்யூனிகேஷன்ஸ்
வழங்கும்

பாவலர் முகவை திருநாதனின்
‘எதையும் தாங்கும் இமயம் அண்ணா’
நூல் அறிமுக விழா

நாளும் பொழுதும்:
17.10.2010
ஞாயிறு மாலை 6.00 மணி

இடம்:
மும்பை பரவர் சங்க வளாகம்,
டி13/8, மாட்டுங்கா லேபர் கேம்ப், மும்பை

தலைமை:
திரு. அல்பர்ட் ராயன், தொழிலதிபர், முலுண்ட்
முன்னிலை:
திரு. இராஜா வாயிஸ், பத்திரிகையாளர்
திரு. அலிசேக் மீரான் ,தொழிலதிபர்

வரவேற்புரை:
பேரா. சமீரா மீரான், (தமிழ் எழுத்தாளர் மன்ற மேலாண்குழுத் தலைவர்)
தொடக்கவுரை:
திரு. அ.இரவிச்சந்திரன், தமிழ் எழுத்தாளர் மன்றப் பொருளாளர்
நூல் முதல் படி வெளியிடுபவர்
திரு. அல்பர்ட் ராயன், தொழிலதிபர், முலுண்ட்
நூல் முதல் படி பெறுபவர்
திரு. த.மு பொற்கோ, செயலாளர் மும்பை மாநகர திமுக

வாழ்த்துரை:
திரு. பொ. அப்பாதுரை - செயலாளர், மும்பை புறநகர் தி.மு.க
திரு. சு. குமணராசன்- முதன்மை ஆசிரியர், தமிழ் இலெமூரியா
திரு. நாஞ்சில் அசோகன், தலைவர், கவியரசர் கண்ணதாசன் பேரவை
பாலவர் பாலையா- மராத்திய மாநிலத் தமிழ்க் கவிஞர் மன்றம்
கவிஞர் நெல்லை வசந்தன்- மராத்திய மாநிலத் தமிழ்க் கவிஞர் மன்றம்
கவிஞர் இறை ச. இராசேந்திரன்- செயலாளர் தமிழ் காப்போம்

திரு.எஸ். இரவீந்திரன்
மாரத்திய மாநில அ.இ.அ.தி.மு.க
திருமதி. அமலா ஸ்டான்லி
தலைவர், தமிழ் எழுத்தாளர் மன்றம்
திரு. அ. இராசமாணிக்கம்- வசாய்ரோடு தமிழ் சங்கம்
கவிஞர் புதிய மாதவி
தமிழ் எழுத்தாளர் மன்ற ஒருங்கிணைப்பாளர்
திரு. கராத்தே முருகன்- தமிழ் டிரஸ்ட்
திரு. ஞான அய்யாப்பிள்ளை
தமிழ் எழுத்தாளர் மன்றம்

ஆய்வுரை
கவிஞர் குணா தலைவர், தமிழர் நட்புறவுப் பேரவை

ஏற்புரை
நூலாசிரியர் பாவலர் முகவை திருநாதன்

நன்றியுரை
திரு. வதிலை பிரதாபன் (எழுத்தாளர் மன்றச் செயலாளர்)

தொகுப்புரை
கவிஞர் கிங்பெல்
செயலாளர், தமிழர் நட்புறவுப் பேரவை

நிகழ்ச்சிக்கு உறுதுணை:
மராத்திய மாநிலத் தமிழ் எழுத்தாளர் மன்றம்
தமிழர் நட்புறவு பேரவை

சொல்லி அடித்த அடி

நேற்று தொடங்கிய மகாராஸ்ட்ரா சட்டமன்ற கூட்டத்தொடரில் நடந்த அடிதடி இந்திய ஜனநாயகத்திற்கு புதிதானதல்ல. ஆனால் நம்மூர் சினிமா ஸ்டார்கள் பாணியில் சொல்லி அடிப்பேன்டா என்ற தோரணையில் இந்தியில் உறுதிமொழி எடுத்தால் கட்டாயம் துவைத்து விடுவேன் என்று சொன்ன வாக்குறுதியை நவநி்ர்மான் தலைவர் ராஜ் தாக்கரே காப்பாற்றி உள்ளார்.
மொழியை வைத்து ராஜ் தாக்கரே அரசியல் செய்ய தமிழக தலைவர்களிடமிருந்து கற்றுக்கொண்டதாக வட இந்திய ஊடகங்கள் எழுதுகின்றன. மொழியை வைத்து அரசியல் வியாபாரம் செய்யலாமா அல்லது அது எந்த அளவிற்கு இப்போது வெற்றி பெறும் என்பது ஒரு புறம் இருக்கட்டும். வழக்கம் போல் ராஜ் தாக்கரே இப்படி செய்யும் அதிரடி வேலைகளால் மும்பைக்கர்கள் அரண்டார்களோ இல்லையோ ஆனால் அவரின் தாய்கட்சியான சிவசேனா மிரண்டு போய் தான் உள்ளது.
24 மணி நேர செய்தி சானல்களின் புண்ணியத்தால் அபு அஸ்மீ குடும்ப பெண்களின் பரிதாபத்தை பெற்றுக்கொண்டாலும் இந்த மனிதருக்கு ஏன் இந்த வீம்பு என்ற பேச்சும் இல்லாமல் இல்லை. இந்தி வாசிக்கத் தெரிந்தவர்களால் மராத்தி வாசிக்க இயலும். இரண்டிற்குமே கிட்டத்தட்ட எழுத்து முறை ஒன்று தான். அப்படி இருக்க எனக்கு மராத்தி தெரியாது என்ற அபுவின் வாதத்தை பெரும்பாலோர்கள் ஏற்றுக்கொள்ளவில்லை. அபுவும் ஒரு வம்பு உண்டாக்க வேண்டும் என்ற நோக்கத்திலேயே செயல்பட்டதும் அப்பட்டமான உண்மை.
இந்தி தேசிய மொழி என்றால் அதற்கு பொருள் பிராந்திய மொழி களை அழித்து விட வேண்டும் என்பதல்ல. அடித்தது தவறு தான். ஆனால் அந்த கோபத்தில் ஒரு நியாயம் இருக்கிறது. இந்த கோபம் 50 ஆண்டுகளுக்கு முன்னர் தோன்றி இருந்தால் தமிழர் இந்தி எதி்ர்ப்பு போராட்டத்திற்கும் உறுதுணை கிடைத்திருக்கும், மராத்தியர்களும் இவ்வளவு இழந்திருக்க வேண்டிய தேவை இருக்காது.

கோட்டை விட்ட கருணாநிதி

கோட்டை விட்ட கருணாநிதி

திமுக அரசாங்கம் இரண்டு முறை ஈழத்தமிழருக்காக தனது ஆட்சியை காவு கொடுத்தது. இந்த தியாகம் பலமுறை அதன் தலைவர்களால் மேடைகளில் முழங்கப்பட்டு வந்தது. கடந்த மாதம் சட்டமன்ற கூட்டத்தொடரில் கூட இதைப்பற்றி குறிப்பிட்ட கலைஞர் கருணாநிதி இன்னுமொறு முறை இதற்காக ஆட்சியை இழக்கத்தயார் என்று கூறினார்.
கடந்த இரண்டு முறை திமுக இலங்கைப்பிரச்சனையை வைத்து ஆட்சியை இழந்தது அந்த கட்சி விரும்பி செய்தது அல்ல. மாறாக திமுக தலைவர்களின் கூற்றுபடியே பார்த்தால் அந்த டிஸ்மிஸ்கள் அநியாயமானவை. ஆனால் இந்த முறை திமுக தானாகவே முன்வந்து இலங்கை பிரச்சனைக்காக வேண்டி தனது ஆட்சியை தியாகம் செய்ய வேண்டிய தேவை ஏற்பட்டது. ஆனால் கருணாநிதி அதனை பயன்படுத்தாமல் கோட்டை விட்டு விட்டார்.
பாராளுமன்ற தேர்தலுக்கு நான்கு மாதங்கள் தான் உள்ளது. மாநிலத்திலும் கூட்டணி கட்சிகளை நம்பி ஆட்சி செய்ய வேண்டிய கட்டாயம். இப்படிப்பட்ட சூழ்நிலையில் கிளிநொச்சி மீது இலங்கை ராணுவம் தாக்குதலை தீவீரப்படுத்தும் முன்னர் கலைஞர் தனது ஆட்சியை இலங்கை தமிழர்களுக்காக தியாகம் செய்ய முன்வந்திருந்தால் அவருக்கு பெரிய நஷ்டம் ஏற்பட்டிருக்காது. ஆனால் நசுக்கப்பட்ட இலங்கை தமிழ் இனத்திற்கு பெரிய லாபம் கிடைத்திருக்கும்.

இன்றைய சூழ்நிலையில் சோனியா காந்தி திமுகவை விடவே முடியாது. சிலர் சொல்லுவது போல சோனியா காந்திக்கும் இலங்கை தமிழர் விசயத்தில் பலி வாங்கும் எண்ணம் இல்லை. இந்த சூழ்நிலையில் திமுக கொஞ்சம் கண்டிப்பாக நடந்து கொண்டிருந்தால் இன்றைக்கு தமிழர்களின் எதிரிகள் மகிழ்ச்சி அடைவதற்கான சூழ்நிலை உருவாகி இருக்காது. மத்திய அரசு இவ்வளவு மெத்தனமாக செயல்பட்டதற்கு முக்கிய காரணம் கருணாநிதியின் மிரட்டல் வெறும் பொழுதுபோக்கு என்று அது எண்ணியது மட்டுமே.
இந்திய வெளியுறவுச் செயலாளர் மேனன் மற்றும் வெளியுறவு மந்திரி பிரனாப் முகர்ஜி ஆகியோரின் கொழும்பு பயணங்கள் இதை இன்னும் உறுதி செய்கின்றன. மேனனும்,பிரனாப்பும் இலங்கை ராணுவத்தின் வெற்றியை பகிர்ந்து கொள்ளத்தான் இலங்கை சென்றனர் என்ற சிங்களவர்களின் பேச்சை கருணாநிதி கூட மறுக்க முடியாது. இதில் இந்த இருவரும் கருணாநிதியிடம் ஆலோசனை செய்த பின்னர் தான் இலங்கை சென்றனர் என்பது ஒரு கேளிக்கூத்தின் உச்சகட்டம்.
திமுகவின் உள்ள பலருக்கு கலைஞர் இலங்கை பிரச்சனையில் சிறப்பாக செயல்படவில்லை என்ற உணர்வு உள்ளது. வரும் தேர்தலில் அது கட்டாயம் அது பிரதிபலிக்கும். பாராளுமன்ற தேர்தலுக்கு முன்னர் வாக்குகளை மனதில் வைத்து மத்திய அரசு இலங்கை தமிழர் பிரச்சனையில் சில நாடகங்களை போடலாம். ஆனால் அது எந்த அளவு மக்களிடம் எடுபடும் என்பது டாக்டர் ராமதாஸ், திருமாவளவன் கைகளில் தான் உள்ளது.

இந்திய வெளியுறவு செயலாளர் எதற்காக கொழும்பு சென்றுள்ளார்?

பாவப்பட்ட இலங்கைத்தமிழர்களும் மரத்துப்போய் நிற்கும் இந்திய அரசும்

இன்றைக்கு தினமலர் தலைப்பு செய்தியை படித்த உடன் அந்த பத்திரிகையின் தமிழ் எதிர்ப்பு கோமாளித்தனம் வெளிப்பட்டு நிற்பதுடன் அதனுடன் சேர்த்து இந்திய அரசாங்கம் தமிழர்களை எப்படி முட்டாள்களாக நினைப்பதையும் நிர்வாணமாக காட்டியுள்ளது.

இலங்கை பிரச்சனையில் தொல் திருமாவளவன் இருக்கும் உண்ணாவிரதத்தை நாடகம் போல் சித்தரிக்கும் தினமலர் செய்தி இந்திய வெளியுறவுத்துறை செயலரின் இலங்கை பயணத்தை சிரத்தை மிகுந்த ஒரு பயணம் காட்ட முயன்றாலும் அதில் அடுத்த பத்தியியேலே சாயம் வெளுத்து போய் நிற்கிறது.

இலங்கைக்கு இந்திய வெளியுறவுத்துறை செயலாளர் போர் நிறுத்தத்திற்கு செல்லவில்லை. அவர் பயணம் முடிந்த அளவு இலங்கையை திருப்திப்படுத்தவே நடக்கிறது என்பதை சொல்லும் தினமலர் இதை நாடகம் என்று சொல்லாமல் திருமாவளவன் உண்ணாவிரதத்தை நாடகம் என்று சொல்லுகிறது என்றால் இப்படிப்பட்ட பத்திரிகைகள் தரம் எப்படி இருக்கிறது.

இலங்கை தமிழர்களுக்கு ஏற்பட்டுள்ள இந்த நிலை குறித்து உலகத்ததமிழர்கள் அனைவரும் தூக்கத்தை தொலைத்துக்கொண்டிருக்கும் போது கருணாவின் காட்டிக்கொடுக்கும் பேட்டியை போட்டால் கூட பத்திரிகை சுதந்திரம் என்று சொல்லி சகித்துக்கொள்ளலாம். நாடக பாத்திரங்களை மாற்றி போடுகிறது என்றால் இப்படிப்பட்ட பத்திரிகைகளை தமிழகத்தின் முன்னணி பத்திரிகை என்று சொல்லுவது தமிழர்களுக்கு தான் கேவலம்.

இலங்கை பிரச்சனையில் இந்தியால் என்ன செய்யமுடியும்? ஒன்றும் முடியாது என்பதை விட புலிகள் முற்றிலும் அழிக்கப்படும் வரை இந்தியா ஒன்றுமே செய்யாது என்பது தெரிந்தது. தமிழர்களை கூண்டோடு அழிக்க வெறிகொண்டு அழையும் , தமிழக தலைவர்களை அரசியல் கோமாளிகள் என்று சொன்ன இலங்கை தளபதி சரத்தை சிறந்த இராணுவ தலைவர் என்று பாராட்டிய இந்திய வெளியுறவு செயலாளர் எதற்காக கொழும்பு சென்றுள்ளார். சரத்தை நேரில் பாரட்டவா?

இந்த விவகாரத்தில் இலங்கை தமிழர்களை விட பாவப்பட்டவர்களாக தெரிவது பலமின்றி புதுடெல்லியை பார்த்து நிற்கும் தமிழக அரசியல் தலைவர்கள் தான்.

இலங்கையில் ஈழர் பலி

இலங்கையில் ஈழர் பலி

மும்பை இலக்கிய உலகின் ஒரு விடிவெள்ளி. பல்வேறு கவிதை தோட்டங்களுக்கு சொந்தக்காரர், அன்பர், நண்பர் திரு. முகவைத்திருநாதன் அவர்களின் ஈழத்தமிழர் பற்றிய கவிதை கண்ணீர் ஒன்று இதோ:

உருளும் உலகின் ஒவ்வோர் அங்குலமும்
உருவாகி இருக்கும் ஒவ்வோர் உயிர்க்கும்
புழுவென அவைவாழ புகழிடம் ஆகுமே ( அவையாவும்)
உலகின்மேல் தாம் கொண்ட உரிமைகள் பாடுமே

உன்னைப்போல் பிறரையும் எண்ணிப்பார் தெரியும் ( அதுயிம்)
மண்ணுளோர் மனமிருப்பின் மற்றவை மறையும்
தனக்கொன்று பிறர்க்கொன்று புறம்பேசித்திரியின்
கணக்குள் அடங்கா பிணக்குகள் பிறக்குமன்றோ

பரமுள நீதிதனை பலமுளான் மீறலாமோ
அறமற்றவன் பீடமேறின் அநீதியே நீதியாமோ!
அரக்கனென அவனைச்சொல்ல அகிலம் தயங்கலேனோ
சிரமற்றார் போலுலகு இருநாக் கேற்பதேனோ!

உடமை உரிமை தன்மானம் பறிபோகும்போது
கடமை எதுவெனில் உரிமைக்காய் உயிர்த்தலே
உடலுயிர் அனைத்தும் உரிமைக்காய் நீக்குவர்
விடலுயிர் உரிமைக்காய்மேலான தென்றே

கண்முன் அநீதிகண்டும் கண்பட்டி கட்டலாமோ ( கண்டும்)
பின்திரும்பும் பழக்கம் பெடையர்க்கன்றோ சொந்தம்!
கயமையின் காட்டுத்தீயில் ஈழர்பலி போகலாமோ!
நயவஞ்சக நியத்தாலே நீதிசாம்பல் ஆகலாமோ!


கண்முன் அநீதிகண்டும் கண்பட்டி கட்டலாமோ

மீண்டும் ராஜ் தாக்கரே…

என்னை கைது செய்து பாருங்களேன் என்று மகாராஸ்ட்டிரா நவ்நிர்மன் சேனா தலைவர் ராஜ் தாக்கரே விடுத்த மிரட்டலுக்கு ( உண்மையைச்சொன்னால் வேண்டுகோளுக்கு) இணங்க மகாராஸ்ட்ரா அரசாங்கம் தங்களிடம் போலீஸ் துறை என்று ஒன்று உண்டு என்பதை நிருபித்துள்ளது. கடைசியாக எல்லா கட்சிகளும் செய்த ஆர்ப்பாட்டம் தாங்காமல் இனி வழியே இல்லை என்று மாநில அரசாங்கம் ரத்தினகிரியில் வைத்து இன்று அதிகாலை ராஜ் தாக்கரேயை கைது செய்துள்ளது.

அரசியல் கட்சித்தலைவர்களை அதுவும் அடாவடி அரசியல் நடத்துபவர்களை கைது செய்வது கொஞ்சம் கஷ்டம் தான். பால்தாக்கரே போன்றவர்களை கைது செய்தால் அடுத்தவர்களை அந்த கட்சியினர் அடிப்பார்கள். தமிழகத்தில் சில கட்சித்தலைவர்கள் கைது செய்யப்பட்டால் அந்த கட்சியினர் தங்களைத்தானே மண்ணென்ணை கேன் வைத்து அழித்துக்கொள்ளுவார்கள். தற்கொலை கலாச்சாரத்தை உலகிற்கு அறிமுகம் செய்த பாரம்பரியத்தின் இரத்தங்கள் என்பதின் வெளிப்பாடோ என்னவோ?

பொதுவாக இப்படி தலைவர்கள் கைது செய்யப்படும்போது ஏற்படும் கொந்தளிப்பை வைத்துத்தான் அவர்களின் பலம் எப்படி இருக்கிறது என்பதை கணிக்கப்படுகிறது. ஜெயலலிதா ஆட்சியில் கருணாநிதி நள்ளிரவில் கைது செய்யப்பட்ட அன்று சென்னையில் பெரிய அளவில் வன்முறை எதுவும் இருக்கவில்லை. அதை வைத்து திமுகவிற்கு சென்னையில் கூட ஆதரவு இல்லையோ என்று சந்தேகித்து எழுதிய பத்திரிகைளும் இருக்கின்றன. ஆனால் இந்த கைது தான் திமுக மீண்டும் ஆட்சி பிடிக்க உதவிய முதல் படி என்பது ஒருபுறம் இருக்கட்டும். அந்த கைதை சன்டிவி கதற கதற காட்டி கிட்டத்தட்ட ஒருவகையான மனநோயையே சிலருக்கு உண்டாக்கியதையும் இங்கு மறக்க முடியாதது தான்.

இப்போது ராஜ் தாக்கரே கைது செய்யப்பட்டுள்ளார். தான் கைது செய்யப்பட்டால் மகாராஸ்டிரா பத்தி எரியும் என்று அவர் மிரட்டினார். ஆனால் இதுவரை எதுவும் பத்தி எரியவில்லை, சிவசேனாவினரின் வயிற்றெரிச்லைத்தவிர.

ராஜ் தாக்கரே சொல்லுவதில் நியாயம் இருக்கிறதா என்று பார்த்தால் ஆம் என்று தான் சொல்ல வேண்டும். ஆனால் அதற்கு அவர் கையாளும் வன்முறை தான் முகத்தை சுழிக்க வைக்கிறது. இந்தி பேசாத வடஇந்திய மாநிலங்கள் தேசிய ஒருமைப்பாடு என்ற பெயரில் தொடர்ந்து விட்டுக்கொடுத்தமையால் வந்த கேடுகள் இது.

மகாராஸ்டிராவில் மராத்தி பேசுகிறார்கள். குஜராத்தில் குஜராத்தி பேசுகிறார்கள். ஆனால் இந்த இரண்டு மாநிலங்களிலும் பிராந்திய மொழி திரைப்படங்கள் மருந்துக்கு தான் உள்ளது. திரைப்படங்கள் மட்டும் இல்லாமல் பல்வேறு துறைகளில் மராத்தி மற்றும் குஜராத்தி கலாச்சாரங்ளை இந்தி அழித்துள்ளது. இன்றைக்கு மும்பையை எடுத்துக்கொண்டால் இங்கு வாழ இந்தி கட்டாயம் தேவை. ஆனால் மராத்தி தேவையில்லை. இப்படி சென்னையில் ஒருநிலை வந்தால் நமக்கு எப்படி இருக்கும்?


ராஜ்தாக்கரேயின் இந்த அரசியலால் பிராந்திய கலாச்சாரங்கள் வலுப்பெறுபவதற்கான வாய்ப்பு ஏற்பட்டுள்ளது என்பது மகிழ்சிக்குரிய ஒரு விசயம் . ஆனால் ராஜ்தாக்கரே மராத்திய கலச்சாரம் பற்றி கவலைப்படும்போது அதில் ஆதிகால மனிதனின் வன்முறையை ஆயுதமாக்குவது தான் கவலை தருகிறது.

ரயில்வேக்கள் இந்தியை பரப்பும் கருவிகளாக பயன்படுத்தப்படுகின்றன. ரயில்வேக்களில் வட இந்தியர்கள் தான் அதிக அளவில் வேலைக்கு அமர்த்தப்படுகின்றனர். பல வேலைவாய்ப்பு அறிவிப்புகள் இந்தியில் மட்டும் வெளியிடப்படுகின்றன. சமீபகாலமாக பீகாரைச்சேர்ந்தவர்கள் பெருமளவில் வேலைக்கு சேர்க்கப்படுகின்றனர். இதற்கு பல புள்ளியியல் ஆதாரங்கள் உள்ளன. இவைகள் கண்டிக்கப்பட வேண்டியவையே.

தேசிய ஒருமைப்பாட்டின் பெயரில் பிராந்திய நலன்களை காவு கொடுக்கக்கூடாது. சென்னைக்கு வரும் ஒரு வெளிமாநிலத்தவர் விரைவில் தமிழ் கற்றுக்கொண்டு தமிழில் பேசுகிறார். மும்பைக்கு வரும் ஒரு வெளிமாநிலத்துக்காரர் மராத்திக்கு பதிலாக இந்தி கற்றுக்கொள்ளுகிறார். இது மராத்திய கலாச்சாரத்தை அழித்து விடும் படிக்கல்.

குஜராத்தியர்கள் தங்கள் மொழியை காவு கொடுத்து இந்தியை ஏற்றுக்கொண்டதால் அவர்களுக்கு வியாபார பலன்கள் கிடைத்தது , ஆனால் மராத்தியர்களுக்கு ஒன்றுமே கிடைக்கவில்லை.

எனவே ராஜ் தாக்கரேயின் உணர்வுகளை வரவேற்கிறோம். ஆனால் அதற்கு கையாளும் வழிமுறைகளை கண்டிக்கிறோம். இதற்கு பதிலாக ராஜ் தாக்கரேயின் அலுவலகங்களில் அடுத்தவர்களுக்கு இலவசமாக மராத்தி சொல்லிக்கொடுத்தால் அது அவரின் கொள்கைகளுக்கு இன்னும் வலு கொடுக்கும்.

கருணாநிதி என்ன செய்வார்?

இலங்கை தமிழர் பிரச்சனையில் தமிழக முதலமைச்சர் கலைஞர் கருணாநிதி என்ன செய்யபோகிறார் என்பதை விட அவர் என்ன சொன்னாலும் அதை எதிர்மறையாக எடுத்துக்கொள்ள வேண்டும் என்று என்று பெரிய கூட்டம் காத்திருக்கிறது.
இன்று காலையில் ஏழு மணிக்கு என்டிடிவி ஆங்கில செய்தி கருணாநிதி இலங்கை தமிழர் பிரச்சனையில் மத்திய அரசியலிருந்து விலகுவதவாக மிரட்டல் என்று செய்தி வெளியிட்டது. அவர் அப்படி சொன்னது உண்மை தான். ஆனால் கலைஞர் டிவியில் ஏழரை செய்தியில் அந்த மிரட்டல் பற்றி ஒன்றுமே குறிப்பிடப்படவில்லை.
இலங்கை தமிழர் பிரச்சனையில் கருணாநிதியால் அல்லது மத்திய அரசால் கூட இப்போது பெரிதாக ஒன்றும் செய்து விடமுடியாது என்ற கனமான உண்மை ஒருபுறம் இருந்தாலும் கிளிநொச்சியை இலங்கை ராணுவம் நெருங்கும் போது அது இந்தியாவில் ஒரு சலசலப்பையும், தமிழகத்தில் மற்றுமொரு கேளிக்கூத்தையும் உருவாக்கும் என்பது எதிர்பார்த்தது தான்.
இலங்கை தமிழர்களுக்கும் தமிழக தமிழர்களுக்கும் உள்ள உறவு தொப்புள் கொடி உறவு என்பதை யாரும் மறுக்க முடியாதது தான். பக்கத்து ஊர் மாதிரி அருகில் இருக்கும் இலங்கையில் நம்மவர்கள் கூண்டோடு அழிக்கப்படுவதை காணும் போது உண்மை தமிழர்களுக்கு நெஞ்சம் பிழியப்படுவது உண்மை தான்.
ஆனால் தற்போதைய சர்வதேச அரசியல் சூழ்நிலைகளில் இந்த பிரச்சனையில் இந்திய அரசால் கூட ஒன்றுமே செய்யமுடியாது. தமிழர்களை கொல்லாதே என்று ஒரு கண்துடைப்பு நாடகத்தை மட்டுமே நடத்திட முடியும்.
இலங்கை தமிழர்கள் விசயத்தில் அதிகபட்சம் நாம் செய்யக்கூடியது, தமிழகத்தில் உள்ள அனைவரும் ஒட்டுமொத்தமாக இந்த இனப்படுகொலையில் இடிந்து போய் இருக்கிறோம் என்று காட்டுவது மட்டும் தான். மற்றபடி இந்த பிரச்சனையை வைத்து தமிழகஅரசியல் கட்சிகள் அனைத்துமே செய்யக்கூடிய கேலிக்கூத்துக்கள் இந்த நம் வலியை இன்னும் கூட்டத்தான் முடியும்.
ஆனால் இதில் ஒன்றை நாம் யாரும் மறுக்க முடியாது. கலைஞரும் இதை அரசியல் லாப ரீதியாக தான் பார்ப்பார் என்ற குற்றச்சாட்டு ஒரு புறம் இருந்தாலும் அவரை போன்று இன்றைய சூழ்நிலையில் வேறு யாரும் இதைக்கூட செய்ய முடியாது என்பது தான் உண்மை.

மும்பையில் தினகரனும் தினத்தந்தியும்

தமிழ் மும்பைக்கர்களுக்கு இன்றைக்கு ஒரு முக்கியமான நாள். ஆம் தமிழகத்தில் இதுவரை சேவை செய்து வந்த இரண்டு பெரிய நாளிதழ்களான தினகரனும், தினத்தந்தியும் இன்று முதல் மும்பையில் தங்கள் கடையை விரித்துள்ளன. மராத்திய முரசு, தினபூமி மற்றும் தமிழ்டைம்ஸ் என ஏற்கனெவே மூன்று பத்திரிகைள் இருக்கு புதிய இரண்டு பெரிய பத்திரிகைகளின் வருகை மும்பை தமிழர்கள் மத்தியில் ஒரு விறுவிறுப்பை உண்டாக்கியுள்ளது.

பொதுவாக தமிழகத்தை விட்டு வெளியே போன தமிழர்கள் தரத்துடனும் தமிழ் பண்பாட்டில் சிறிது வலிவுடனும் இருப்பார்கள் . ஆனால் மும்பையில் இது சிறிது மோசம் தான். மும்பை தமிழகர்ளுக்கு என்று அடையாளம் என்ன என்று கேட்டால் அதை கண்டுபிடிப்பது கொஞ்சம் கடினம் தான்.

மும்பைக்கு தமிழ் தலைவர்கள் யார் என்று கேட்டால் அவ்வப்போது வந்தார்கள் வென்றார்கள் என்ற தலைப்பில் லோக்கல் பத்திரிகைகள் தலைப்பிட்டு போடும் கட்டுரைகளை வைத்து தான் மதிப்பிட முடியும். இந்த பட்டியல் எப்படி தயாராகிறது என்பது ஒரு பெரிய வினோதமான விசயம். பத்திரிகையாளர்களை நன்றாக கவனிக்கத்தெரிந்த அல்லது பத்திரிகையாளரின் சாதி்க்காரர்ள் தான் இந்த சாதனையாளர்களின் பட்டியலில் பொதுவாக வருவார்கள். மாதத்திற்கு ஐந்தாயிரம் பத்திரிகையாளர்களுக்கு செலவழிக்கக்கூடிய பலர் தான் இன்றைக்கு மும்பைத் தமிழ் தலைவர்கள்.

இப்படிப்பட்ட சூழ்நிலையில் மும்பையில் தினகரனும், தினத்தந்தியும் இங்கு பலத்த ஆரவாரத்துடன் நுழைந்துள்ளன.மும்பை பெஸ்ட் பேருந்துகளில் தமிழில் தினத்தந்தி விளம்பரத்தை பார்த்தது கொஞ்சம் வித்தியாமாகத்தான் இருந்தது. இதுவரை இங்கு இப்படி தமிழ் விளம்பரங்கள் வந்ததில்லை என்பதை இங்கு குறிப்பிடாமல் இருக்க முடியாது. தினத்தந்தி இப்படி முந்திக்கொண்டு வந்ததை முறியடிக்க தினகரன் தனது அசுர பலமான சன் டிவி நெட்வொர்க்கை பயன்படுத்தி தனது மும்பை வரவை உலகத்தமிழர்களுக்கெல்லாம் அறிவித்து பரவசத்தை கூட்டியது.

மும்பையை பொறுத்த வரையில் எத்தனை தமிழர்கள் இருக்கிறார்கள் என்பது தமிழகத்தில் எந்த சாதியினர் எத்தனை சதவிகிதம் என்று கணக்கு சொல்லுவது போல சிறிது கடினமான விசயம். மேடைகளில் 15 லட்சம் , 20 லட்சம் தமிழர்கள் வாழுவதாக பலர் முழங்குகிறார்கள். ஆனால் மும்பையில் மொத்தம் ஒரு நாளைக்கு விற்பனையாகும் தினசரி எண்ணிக்கை கிட்டத்தட்ட 35 ஆயிரம் பிரதிகள் தான். இந்த எண்ணிக்கையில் பங்கு போட்டு்க்கொள்ளத்தான் புதிதாக இரண்டு பேர்கள் வந்துள்ளார்களா என்றால் அந்த கேள்வியில் தான் இந்த இரு பத்திரிகைகளின் எதிர்காலம் மற்றும் மும்பை தமிழர்களினன்அடையாளம் அடங்கியுள்ளது.

மும்பையில் தமிழ் பத்திரிகை வாங்குபவர்களின் எண்ணிக்கை குறைவாக இருப்பதற்கு காரணங்கள் என்ன?
அ) பொதுஇடங்களில் கையில் வைத்து கொண்டு போகும் அளவிற்கு இங்குள்ள தமிழ் தினசரிகள் தரமானவை அல்ல. திருமண விளம்பரங்கள் மரண விளம்பரம் போல பலவேளை வருகின்றன.
ஆ) சிதறிக்கிடக்கும் தமிழர்களை தமிழ் பத்திரிகை சென்றடைவது ஒரு இயலாத காரியம்.
இ) தமிழ் தினசரிகள் தரமான செய்திகளை தருவதில்லை.
ஈ) மும்பை தமிழர்களில் புதிய தலைமுறையினருக்கு தமிழ் படிக்க தெரிவதில்லை.

இப்படிப்பட்ட சூழ்நிலையில் தினகரனும் தினத்தந்தியும் எப்படி தங்களையும் தமிழையும் வளர்க்க போகின்றன என்பது ஒரு மில்லியன் டாலர் கேள்வி தான். இதுவரை தமிழ் பத்திரிகைகள் வாங்காத குடும்பத்தினரை தங்கள் பத்திரிகையை வாங்க வைப்பதில் தான் இதன் வெற்றியின் ரகசியம் இருக்கு முடியும்.. புதியவர்களை எப்படி தமிழ் பத்திரிகை வாங்க வைக்கப்போகிறார்கள் என்பதில் தான் வியாபார யுத்தி அடங்கியுள்ளது.

திமுககாரர்கள் தினகரன் வாங்கக்கூடாது என்று கலைஞர் சொல்லி விட்டார். அவர் சொன்னதை திமுககாரர்கள் கேட்கவில்லை என்பது ஒருபுறம் இருக்க மும்பை தினத்தந்தியை வாழ்த்தி தமிழக முதல்வரின் செய்தியை தினத்தந்தி வெளியிட்டு தினகரனுக்கு முதலிலேயே ஒரு செக் வைத்துள்ளது.

இப்படிப்பட்ட சூழ்நிலையில் இங்கு யார் ஜெயிக்கப்போகிறார்கள் என்று பார்க்கும் போது நடுநிலையில் இருப்பவர்கள் வேண்டுவது தமிழ் ஜெயித்தால் சரிதான் என்பது தான். இந்த பெரிய பத்திரிகைகளின் போட்டியில் ஏற்கனெவே உள்ள பத்திரிகைகள் எவ்வளவு காலம் தாக்குபிடிக்க போகிறது என்பது அடுத்த பெரிய கேள்வி???

மன்மோகன்சிங் தலை தப்புகிறது

நம்பி்க்கை வாக்கெடுப்பில் காங்கிரஸ் கட்சி எப்படியும் வென்று விடும் என்ற நம்பி்க்கையுடன் தான் பிரதமர் மன்மோகன் சிங் ஜூலை 21ம் தேதி பாராளுமன்றத்திற்குள் நுழைந்தார். கடந்த ஒரு வாரமாக ஒவ்வொரு எம்பி ஓட்டும் இதுவரை இல்லாத மதிப்பு பெற யார் எந்த பக்கம் உள்ளார்கள் என்பது அவர்களுக்கே தெரியாத நிலையில் புதுடெல்லியே கலங்கிய ஒரு குட்டையாகி நிற்க அதில் மீன்பிடிக்க எல்லா அரசியல்வாதிகளும் வலையுடன் நின்றார்கள்.
இந்த நான்கு ஆண்டுகாலத்தில் நம்மைத்தவிர வேறு யாருக்கு தான் பயனாக இருந்தோம் என்ற எண்ணத்தில் இருந்த எம்பிக்களுக்கு கடைசியில் தங்களுக்கும் கடைசி காலத்தில் இப்படி ஒரு மரியாதை கிடைக்கும் என்பது கனவிலும் நினைத்து பார்க்க முடியாத ஒன்று. பங்குச்சந்தையில் விலை வீழ்ச்சி ஏற்பட்டாலும் தங்களின் மதிப்பு கூடித்தான் உள்ளது என்று ஒவ்வொரு எம்பியும் நினைக்கும் அளவிற்கு அவர்களின் கிராக்கி கூடிவிட்டது.
பணவீக்கத்தை காட்டி அடுத்த ஆட்சியை கைப்பற்றி விடலாம் என்று கனவு கண்டு கொண்டிருந்த பாரதிய ஜனதா கட்சிக்கு அணுஆயுத ஒப்பந்த விசயத்தில் என்ன நிலை எடுக்க என்று தொடக்கத்திலிருந்தே குழப்பம் தான். இதை எதிர்ப்பது தனது வாக்கு வங்கிகளை பாதிக்கலாம் என்ற பயத்தில் இருந்த அக்கட்சிக்கு மாயாவதி இதில் உட்புகுந்தது அடுத்து என்ன செய்ய என்ற குழப்ப நிலைக்கு தள்ளி விட்டது.
காங்கிரசா அல்லது பாரதிய ஜனதாவா என்ற நிலை மாறி காங்கிரஸா அல்லது மாயாவாதியா என்ற தலைகீழாகி தாங்கள் மூன்றாம் நிலைக்கு தள்ளப்பட்டு விடுவோம் என்ற நிலைமை தாமரை கட்சிக்கு ஏற்பட்டது எதிர்பாராத ஒன்று தான். மாயாவதி பிரதமர் ஆக ஆதரவு தர மாட்டோம் என்றும் மாயாவதி விஸ்வருவத்தால் காங்கிரஸ் தான் பாதிக்கப்படும் என்று பாரதிய ஜனதா தலைவர்கள் அறிக்கை இடுவது இந்த பயத்தின் அடிப்படையில் தான்.
தேவகெளடாவும் அஜித்சிங்கும் காங்கிரசுக்கு எதிரணியில் சேர்ந்தாலும் மத்திய அரசு வாக்கெடுப்பில் தப்பிப்பதற்கு போதுமான எண்ணிக்கையை பெற்று விட்டது என்பதே பெரும்பான்மையோரின் எண்ணம். பிரதமர் உரை அந்த தன்னம்பிக்கையை வெளிக்காட்டு்றது என்றால் பிரணாப் முகர்ஜி பாராளுமன்றத்திலேயே தங்களுக்கு 276 எம்பி்க்கள் ஆதரவு உள்ளதாக சொன்னபோது எதிர்கட்சிகள் உறுப்பினர்கள் முகத்தில் ஆச்சரியம் ஒன்றும் எழவில்லை. இதில் கடுமையான கொடுமை காங்கிரசுக்கு பாஜக மற்றும் சிவசேனா அதிருப்தியாளர்களின் ஓட்டுக்கள் தான். எப்படியோ மன்மோகன் தலை தப்புகிறது என்பது தான் இன்றயை நிலைமை

பிரதமர் பதவி ஆசையில்...

கனவு காண்பது எல்லோரின் உரிமை. அதுவும் இந்த நாட்டின் பிரதமராக வேண்டும் என்று யாரும் கனவு காணலாம். சொந்தமான வீடு, சொகுசான கார், சண்டைபோடாத மனைவி என்று கனவுகளை காணும் சராசரி மனிதர்களுக்கு இத்துடன் இந்த நாட்டின் பிரதமராகவும் ஆக வேண்டும் என்ற கனவும் இருக்கலாம். அந்த கனவு மற்ற கனவுகளுடன் கல்லறைக்கு கொண்டு செல்லப்படும். ஆனால் அரசியல்வாதிகள் பிரதமராக வேண்டும் என்று ஆசைப்படும் போது அது வெளியே பேசப்படுகிறது.
அரசியல்வாதிகளின் கனவுகளைப்பொறுத்தவரையில் இந்த கனவு வட்டம், மாவட்டத்திலிருந்து தொடங்கி விடலாம். பிரதமராகி விட வேண்டும் என்று ஆசைப்படும் முதலமைச்சர்கள் இருக்கிறார்கள். தமிழக முதலமைச்சர் கருணாநிதி்க்கு அந்த ஆசை கட்டாயம் இருக்காது. அதற்கு இந்தி பேசச்சொல்லுவார்களோ என்ற காரணம் மட்டுமல்ல. ஆனால் முன்னாள் முதலமைச்சர் செல்வி ஜெயலிதாவிற்கு நிச்சயம் அந்த ஆசை இருக்க வேண்டும்.
சரி நம்ம ஊர்க்காரர்கள் ஆசையை ஒருபுறம் வைத்து விடுங்கள். மகாராஸ்ட்டிராவின் முன்னாள் முதலமைச்சர் சரத்பவாருக்கு இந்த ஆசை பெரியதாக இருந்தது என்று சொல்லுவார்கள். அதை கிட்டத்தட்ட எட்டிய அவருக்கு கடைசியில் கிடைக்காமல் போனது. இப்போது அதற்கு வாய்ப்பு இல்லை என்று அவர் நம்புவது போல் தான் தெரிகிறது. சரத்பவார் பிரதமராக கட்டாயம் ஆதரவு தருவோம் என்று சிவசேனா கூட சொன்னது, ஆனால் ஆதரவு கேட்கும் சந்தர்பம் தான் பவாருக்கு இன்னும் வரவில்லை.
அப்படியே இன்னும் கொஞ்சம் வடக்கே போனால் உத்தரபிரதேசத்தில் பஞ்சாயத்து தலைவர்கள் எல்லோருக்குமே இந்த பிரதமர் கனவு ஆசை உள்ளது. உபியில் வெற்றி அரசியல் நடத்திய தனக்கு புதுடெல்லி நாற்காலி கட்டாயம் கிடைக்கும் என்று அம்மாநில முன்னாள் முதலமைச்சர் முலாயம் சிங் யாதவ் நம்பினார், இன்னமும் நம்புகிறார். நீங்கள் வேண்டுமானால் அந்த பதவியை எடுத்துக்கொள்ளுங்கள் என்று ஏதோ தங்களிடம் உள்ள மசால்தோசையை கொடுப்பது போல கெடுபட்டினி அரசியல் கட்சிகள் அவருக்கு அவ்வப்போது ஆசை காட்டியபோது முலாயம்சிங்கிற்கு இந்த ஆசை கிட்டத்தட்ட நிறைவேறியது போன்ற நம்பிக்கையே உண்டாக்கியது.
இந்தியாவில் இப்போது இந்த ஆசை அதிகம் பிடித்து அலைபவர் உத்திரபிரதேச முதலமைச்சர் மாயாவதி தான். பிற மாநிலங்களிலும் 2 சதவிகிதம் ஓட்டு பெற்று வருவதால் தன்னை காங்கிரசுக்கு மாற்றாகவே நினைத்து விட்டார். இப்போது அவரின் இந்த கனவுக்கு புதிதாக கிடைத்துள்ள ஆதரவு கம்யூனிட் கட்சிகள். போதாக்குறைக்கு சந்திரபாபு நாயுடுவும் மாயாவதி பிரதமராக தனது ஆதரவை தெரிவித்து தனது பெரிய மனதை இன்னும் பெரிதாக்கி விட்டார்.
அடுத்த பிரதமர் யார் என்று சோனியாவுக்கும், அத்வானிக்கும் கட்டாயம் தெரியாது. ஆனால் அந்த பதவிக்கு தாங்கள் வரமுடியாது என்பது அவர்களுக்கு தெரியும். ஆனால் அடுத்த பிரதமரை உருவாக்கும் வாய்ப்பு இவர்களுக்கு கிடைக்கலாம். அப்படியானால் அடுத்த பிரதமர் யார்?
கனவு காணும் உரிமை எல்லோக்கும் உள்ளது. தான் ஒருநாள் பிரதமராவோம் என்று தேவகெளடா கனவு கூட கண்டிருக்க மாட்டாரே.?

மீனவர்களுக்காக திமுகவும் பாமகவும் வரிந்து கட்டுமா?

தமிழ்நாட்டு மீனவர்கள் இந்த நாட்டின் குடிமக்கள் தானா என்று சந்கேதப்படும் அளவிற்கு அவர்களின் எதிர்காலம் பற்றி கவலைப்படாமல் இந்த அரசாங்கம் கைகட்டி வாய்பொத்தி நின்று கொண்டிருப்பது ஒரு அரசாங்கம் தன் ஆதிகுடிகள் மீது இவ்வளவு அலட்சியமாக நடந்து கொள்ள முடியுமா என்ற வேதனையை உண்டாக்கி உள்ளது.
கிட்டத்தட்ட போர்ப்பிரதேசங்களில் வாழ்ந்து கொண்டிருக்கிற மக்களின் சூழ்நிலையை போன்று தான் இன்றைக்கு தென்மாவட்டங்களின் மீனவர்கள் வாழந்து கொண்டிருக்கிறார்கள். தங்களின் பாரம்பரிய தொழிலை தங்களின் புண்ணிய பூமியில் செய்வது இந்த மக்களுக்கு இன்றைக்கு இயலாத காரியமாக மாறிவிட்டது. காலையில் கடலுக்கு செல்லும் தன் கணவன் மாலையில் சிங்கள் பேய்நாய்களின் தாக்குதல்களிலிருந்து தப்பித்து வருவானா என்று ஒவ்வொரு மீனவ பெண்ணும் கவலைப்படும் அளவிற்கு நிலைமை பாதாளத்தில் போய் நிற்கிறது.
பக்கத்தில் இருக்கும் இலங்கை தனி நாடாக இருக்கலாம். ஆனால் மறுகரையான மன்னாரில் உள்ள மீனவர்கள் அனைவரும் இக்கரை மக்களின் சொந்தக்காரர்கள். ஆனால் ஈழப்போர் இன்றைக்கு இந்த இரண்டு கடற்கரையோர மக்களையுமே தங்கள் தொழிலை செய்ய முடியாமல் ஆக்கி விட்டது.
விடுதலைப்புலிகளை அடக்குகிறோம் என்ற போர்வையில் சிங்கள ராணுவம் நம் மீனவர்களை தொழில் செய்ய முடியாது என்ற பயங்கரத்திற்கு கொண்டு போய் விட்டுள்ளது. வெளிநாட்டு கொள்கை என்ற பெயரில் மத்திய அரசாங்கள் பக்கத்து நாட்டு அரசாங்கத்தின் அத்துமீறல்களை கண்டுகொள்ளாமல் நிற்கிறது என்றால் இதற்கு ஒரு சாத்வீக தீ்ர்வு காண மாநில அரசாங்கம் விரும்பாமல் உள்ளது ஆச்சரியத்தையும் ஆத்திரத்தையும் தருகிறது.
ஒரு மீனவனின் உயிர் இந்த அளவிற்கு மலிவாக போய்டவிட்டதா?. இலங்கை ராணுவத்தின் துப்பாக்கிக்குண்டுக்கு பலியான ஏழை மீனவனுக்கு நஷ்டஈடு கொடுக்க வரும் அரசியல்வாதி்க்கு நன்றி போஸ்டர்களை இராமேஸ்வரம் சுவர்களில் பார்க்கும் போது இந்த மக்களை ஏமாற்றுவது இந்த அளவிற்கு எளிதா என்று தோன்றுகிறது.

நிலைமை மோசமாதை கண்டு தமிழகத்தில் திமுகவும் அதிமுகவும் ஒரே நேரத்தில் போராட்டத்தை அறிவித்துள்ளது இந்த சோகத்தில் இவர்கள் செய்ய நினைக்கும் காமடியைத்தான் காட்டுகிறது. மத்தியில் நம்பிக்கை வாக்கெடுப்பில் ஆதரவு தர தன் தந்தையின் பெயரை லக்னோ விமானநிலையத்திற்கு வைக்க வேண்டும் என்ற அஜித்சிங்கின் கோரிக்கையை மத்திய அரசு ஒரே இரவில் நிறைவேற்றி உள்ளது. திமுகவிற்கு மீனவர் நலனில் அக்கறை என்றால் இலங்கை ராணுவத்திற்கு தரும் ஆதரவை இந்தியா விலக்கிக்கொள்ளா விட்டால் ஆதரவு வாபஸ் என்று அறிவிக்கட்டுமே. திமுக இதைக்கட்டாயம் செய்யாது என்று தெரியும், ஆனால் பட்டாளி மக்கள் கட்சி இதைச்செய்யலாமே?

மன்மோகன் சிங்கிற்கு ஒரு சலாம்

கடைசியாக அவர் சொன்னதை நிறைவேற்றப்போகிறார். சோனியாகாந்தியால் விசுவாசம் என்ற ஒரு அடிப்படை தகுதியை மட்டும் வைத்து இந்த நாட்டின் பெரிய பதவிக்கு தேர்ந்தெடுக்கப்பட்டவர் என்ற சிலரின் குற்றச்சாட்டுகளுக்கு பதிலடி கொடுக்கும் வகையில் அமெரிக்காவுடனான அணுஆயுத ஒப்பந்தத்தை நிறைவேற்றியே காட்டுவேன் என்று அடம்பிடித்து மன்மோகன் சிங் இந்திய வரலாற்றில் ஒரு தனி இடத்தை பிடித்துள்ளார்.
வலிமையற்ற பிரதமர் என்றும் காந்தி குடும்பத்தின் வெறும் கைப்பாவை என்றும் வர்ணிக்கப்பட்ட நம் பிரதமர் தனக்கும் தனித்தன்மை உண்டு என்ற செய்தியை தன் எதிரிகளுக்கு தெளிவாக இந்த விவகாரத்தில் வெளிக்காட்டிவிட்டார். எனவே தான் காங்கிரசுடன் தோழமையை முறித்துக்கொள்ள விரும்பாத கம்யூனிட் கட்சிகள் தாங்கள் மன்மோகன் சிங்கை மன்னிக்கப்போவதில்லை என்று அறிக்கை விடத்தொடங்கியுள்ளன.
அணுஒப்பந்தம் நிறைவேற்றுவதில் மன்மோகன் சிங் அமெரிக்காவுடன் ஏதோ தனி வியாபாரமே செய்து கொண்டது போல சிலர் குற்றம் சாட்டுவதில் ஆச்சரியம் ஒன்றுமே இல்லை . அமெரிக்கா என்றாலே வேப்பங்காய் போலும் உலகில் நடக்கும் எல்லா அக்கிரமங்களுக்கும் அந்த ஓரு நாடு தான் காரணம் என்பது போன்றும் இந்த அறிவுஜீவிகள் பேசுவது கிட்டத்தட்ட ஒரு வகை மனவியாதி தான்.
கூடன்குளம் அணுமின்நிலையம் விசயத்தில் கொடிபிடிக்காத கம்யூனிட் கட்சிகள் இப்போது அமெரிக்கா உடனான ஒப்பந்தத்தை மட்டும் எதிர்ப்பற்கு காரணம் என்ன?. அமெரிக்கா என்றாலேயே தீண்டத்தகாத நாடு என்றால் இன்றைக்கு அந்த நாட்டுடன் இந்தியாவை விட அதிக உறவு வைத்துள்ளது கம்யூனிஷ நாடான சீனா தானே. ரஷியா கூட இந்த ஒப்பந்தத்தை ஆதரிக்கும்போது காங்கிரஸ் கட்சியை எதிர்த்தால் மட்டுமே வாக்கு அரசியல் நடத்த முடியும் என்ற கட்டாயத்தில் உள்ள கம்யூனிட்கள் இந்த ஒப்பந்தத்தை எதிர்ப்பது வெறும் உள்ளூர் அரசியல் மட்டும் தானே?

காங்கிரசுக்கு எதிராக நம்பிக்கை இல்லா தீர்மானத்தில் ஓட்டுபோடும்போது அது பாரதிய ஜனதா கட்சியுடன் சேருவதை சகபயணி உறவு என்று அக்கட்சியின் தலைவர்கள் சொன்னாலும் இந்த புதிய கூட்டை கம்யூனிஸ்ட் தலைவர்கள் பலரே விரும்பவில்லை என்பதையும் அக்கட்சியில் எதிர்ப்பு குரல் ஒலிக்கத்தொடங்கி விட்டது என்பதையும யாரும மறுக்க முடியாதே.
கம்யூனிஸ்ட்களுடன் உறவை முறித்ததில் காங்கிரசுக்கு சமாஜ்வாதி கட்சி தொடர்பு கிடைத்துள்ளது. இது கட்டாயம் வரும் பாராளுமன்ற தேர்தலில் அந்த கட்சிக்கு பலத்தை தான் கூட்டப்போகிறது. கம்யூனிஸ்ட் கட்சி மாயாவதி கட்சி பக்கம் இப்போது சென்றுள்ளது. கூட்டணியை மாற்றுவதில் அவர் நம்ம ஊர் ஜெயலலிதாவை விட மோசம். இந்த சூழ்நிலையில் தங்களின் புதிய அணுகுமுறையால் கம்யூனிஸ்ட்கள் மற்றுமொரு தவறை செய்துள்ளார்கள் என்று தான் சொல்ல வேண்டும்.
பணவீக்கம் பிரச்சனையில் சிக்கித்தவித்துள்ள மத்திய அரசு இந்த அணுஆயுத ஒப்பந்த விவகாரத்தை சரியாக பயன்படுத்திக்கொண்டுள்ளது. நம்பிக்கை வாக்கெடுப்பில் மன்மோகன் சிங் பிழைப்பாரா என்பது ஜூலை 22ம் தேதி அன்று தான் தெரியும். ஆனால் இதல் வென்றாலும் தோற்றாலும் காங்கிரஸ் முன்பை விட வலியைமாக உலா வரும் என்பது எதிர்க்கட்சிகளுக்கு இப்போதே நன்றாக தெரியும்.

எனவே மன்மோகன் சிறந்த நிதிஅமைச்சர் மற்றுமட்டுமல்ல எதிர்நோக்கு பார்வை கொண்ட பிரதமரும் கூட என்று பெயர் எடுக்க இந்த ஆயுஆயுத கொள்கை ஒரு வரப்பிரசாதமான வாய்ப்பாகி விட்டது.

குடிமகன்

குடிமகன்


ஞாயிற்றுக்கிழமையானால் கோவிலில் இரண்டாவது பூசை முடிந்ததும் குடிமகன் பீரிஸ் எங்கள் வீட்டிற்கு தவறாமல் வந்துவிடுவார். என் அப்பா ஒவ்வொரு ஞாயிற்றுக்கிழமையும் எப்படி முடிவெட்டிக்கொள்ளுகிறார் என்று எனக்கு பெரிய சந்தேகம் உண்டு. இப்படி வாரம் ஒருமுறை முடிவெட்டிக்கொள்ளுவதால் அவர் போலீஸ் ஆபிஸர் மாதிரி இருந்தாலும் குடிமகன் பீரிஸ் இப்படி வாராவாரம் வீடு வந்து போவதில் வேறு ஒரு காரணமும் இருந்தது.
அது முடிவெட்டிக்கொண்டிருக்கும் போது காதில் ஊர்க்கதைகளை ஊதுவது தான். ஐயா உங்களுக்குத் தெரியுமாய்யா, போன வராம் ஊர்கூட்டத்தில் இன்னார் மகன் இன்னாரை சிலுவை பிடிக்கச்சொல்லி தண்டைன கொடுத்தாங்க ( எங்கள் ஊர்களில் பெரிய குற்றம் செய்பவர்களை சிலுவை கையில் பிடித்துக்கொண்டு ஊர் சுற்றி வரச்செய்வது ஒரு வழக்கம்) என்று தொடங்கி சாமியாருக்கு எதிராக நடுத்தெருவில் நடக்கும் சதி வரை ஊர் நடப்புகளை விலாவாரியாக சொல்லுவார்.
பீரிஸ்பிள்ளை இப்படி போட்டுக்கொடுப்பதில் எனக்கும் வினை வருவது உண்டு. நம்ம பையனை இன்னார் மகன் இன்னாருடன் விளையாடும் இடத்தில் வைத்து பார்த்தேனே. அந்த பையன் சரியில்லை. நம்ம பிள்ளை அவன்கூட எல்லாம் பழகக்கூடாது என்று சொல்லி அவ்வப்போது வேட்டும் வைப்பார்.
முதலில் எனக்கு பீரிஸ்பிள்ளையை அறவே பிடிக்காது. அப்பாவிற்கு வாரம் ஒருமுறை முடிவெட்டுபவர் எனக்கு மாதம் ஒருமுறையேனும் தலையை பதம் பார்த்து விட வேண்டுமென்பதில் அவர் கவனமாக இருப்பது தான் எனக்கு அவரை பிடிக்காததற்கு முதல் காரணம். கமல் மாதிரி கப் முடி வைக்க ஆசைப்பட்ட எனக்கு குடிமகன் பீரிஸ் ஒரு பெரிய வில்லன் தான்.
என்கூட படிக்கும் பையன்கள் எல்லாம் பக்கத்து டவுனில் போய் முடிவெட்டிக்கொண்டிருந்த போது நான் மட்டும் பீரிஸ்பிள்ளையிடம் முடிவெட்டுவது எனக்கு கடுப்பாகவே இருக்கும். ஆனால் பீரிஸ்பிள்ளை இருக்கும் வரை அவர் தான் எனக்கு முடிவெட்ட வேண்டும் என்பதில் என் அப்பா மிகவும் கண்டிப்பாக இருந்தார்.
எங்கள் வீடு மாதா கோவிலுக்கு பக்கத்தில் இருந்தது. யாரும் இறந்துபோனால் இறுதி சடங்கு அடக்க பூசைக்கு பாதிரியாருக்கு உதவி செய்ய ஆல்டர் பாய்ஸ்( கோவில் பீடத்தில் பாதிரியாருக்கு உதவியாக நிற்கும் சிறுவர்கள்) பணிக்கு எந்த பையனும் வரமாட்டான். சாவுக்கு அவ்வளவு பயம். அடக்க பூசை நடக்கும் பொழுதெல்லாம் கோவில் கணக்கப்பிள்ளை( கோவிலில் பாதிரியாருக்கு உதவும் வேலையில் இருப்பவர்) வீடு தேடி வந்து என்னை சாமியாருக்கு உதவ அழைத்துச் செல்வார்.

எனக்கு கோவில் கணக்கப்பிள்ளை மீது கடும் பிரியம். நான் நான்காம் வகுப்பு படிக்கும்போதே என்னை கோவிலில் பைபிள் வாசிக்க ஏற்பாடு செய்தவர் அவர். பைபிள் ஸ்டாண்டை விட உயரம் குறைவாக இருப்பேன் என்பதால் கீழே ஒரு எக்ஸ்ட்ரா பலகை அடித்து என்னை பைபிள் வாசிக்க வைத்தவர் அவர் . பசங்களுக்கு அவரைக்கண்டால் ஒரு பயம். கோவிலில் ஜெபம் நடக்கும்போது பேசிக்கொண்டிருக்கும் வெடிப்பசங்களை அவர் பின்னால் பூனை மாதிரி முதுகில் அடிக்கும்போது கோவிலே திரும்பி பார்க்கும். சிலவேளைகளில் பிரசங்கம் வைத்துக்கொண்டிருக்கும் பாதிரியாரே அடிச்சத்தத்தை கேட்டு பிரசங்கத்தை நிறுத்தி விடுவார்.
ஒருமுறை கீழத்தெருவில் ஒருவர் இறந்துவிடவே வழக்கம்போல அடக்க பூசைக்கு பாதிரியாருக்கு உதவி செய்ய பசங்க யாரும் கிடைக்கவில்லை. அதுவும் இளம்வயது பெண் மரணமடைந்திருந்தார். கோவில் கணக்கப்பிள்ளை இறுதி சடங்கு பூஜைக்கு உதவி செய்ய என்னை தேடி வருவார் என்று எனக்குத்தெரியும். எனவே நான் வீட்டில் சமையறையில் ஒளிந்து கொண்டிருந்தேன். அன்று என் துரதிர்ஷ்டம் அவர் பின்கொல்லை கதவை வந்து தட்டியது தான். நானும் வசமாக மாட்டிக்கொண்டேன்.

கோவில் பூஜைக்கு முன்னர் கீழத்தெருவில் உள்ள இறந்தவர் வீட்டிற்கு பிரேதத்தை எடுக்க பாதிரியாருடன் பூசை உதவி உடுப்புப்போட்டுக்கொண்டு சென்றேன். வீட்டின் முன்னர் ஒரு தட்டிப்பந்தலில் சடலத்தை வைத்திருந்தார்கள். நான் கையில் சிலுவையுடன் அடக்கப்பெட்டி முன்னர் நின்று கொண்டிருந்தேன். பாதிரியார் செபம் சொல்லி மந்திரித்து விட்டு கிளம்பினார்.
உரிமைப்பட்ட சொந்தக்காரர்கள் எல்லாம் சவப்பெட்டியை ஆளுக்கு ஒரு மூலையிலிருந்து தூக்க அழுதுகொண்டிருந்த பெண்கள் எல்லாம் இப்போது உரக்க சப்தமிட்டு பெட்டியை தூக்க விடாமல் தடுக்க ஏற்கெனவே வலுக்கட்டாயமாக பாதிரியாருக்கு உதவிக்கு கொண்டுவரப்பட்ட நான் அடக்க பெட்டி முன்னர் மாட்டிக்கொண்டேன். பெண்களின் ஒப்பாரியில் நானும் சத்தம் போட்டு அழுதுவிட அப்போது அங்கு நின்று கொண்டிருந்த குடிமகன் பீரிஸ் என்னை அந்த அழும் கூட்டத்திலிருந்து காப்பாற்றி வெளியே கொண்டு வந்தார்.
அன்று முதல் எனக்கு பீரிஸ்பிள்ளை மீது சிறிது பாசம் ஆரம்பித்தது. அதன் பின்னர் அவரை எங்கு கண்டாலும் நலம் விசாரிப்பேன். நான் பம்பாய் செல்லுவதாக அவரிடம் சொன்னபோது அங்கு ஒரு நல்ல கத்தரிகோல் வாங்கி கொடுத்து விடு என்றார். ஆனால் நான் அதை அவருக்கு வாங்கிக்கொடுப்பதற்கு முன்னர் அவர் திடீரென இறந்து விட்டதாக செய்தி கிடைத்தது.
குமடிமகன் பீரிஸ் நன்றாக குடிப்பார். ஆனால் காரியத்தில் சரியாக இருப்பார். பலர் பீரிஸ் பிள்ளையிடம் ஓசிக்குத்தான் முடி வெட்டுவார்கள். வருடத்திற்கு அவருக்கு ஏதேனும் கொடுப்பதை பெரிதாக காட்டுவார்கள். கடற்கரையில் அவர் முடிவெட்டும் குடும்பத்தினர்களின் கட்டுமரம் வரும் போது ஒரு பிடி மீன் எடுப்பார். அந்த மீனையும் ஏச்சிக்கும் பேச்சி்ற்கும் இடையில் தான் அவர் எடுக்க வேண்டும். தோட்டம் வைத்திருப்பவர்கள் அறுவடை வரும்போது ஏதேனும் கொடுப்பார்கள். அந்த வீடுகளிலிருந்து குடிமகன் மனைவி வாழைக்குலைகளையும், தேங்காய்களையும் உரிமையுடன் எடுத்துச் செல்லுவார்.
பீரீஸ்பிள்ளை தனது கடைசிகாலத்தில் தன் பிள்ளைகள் பற்றி அதிகம் கவலைப்பட்டார். தனது வேலையை தன் பிள்ளைகள் யாரும் செய்ய வருவதில்லை என்பது அவர் வருத்தம்.
பீரிஸ்பிள்ளை மகன்கள் எல்லோரும் கடலுக்கு மீன்பிடிக்கும் தொழிலை செய்து கொண்டிருந்தனர். அவர் இறந்த பிறகு அவர்களில் ஒரு பிள்ளையை வலுக்கட்டாயமாக குடிமகன் தொழிலுக்கு கொண்டு வந்ததாக கேள்விப்பட்டேன். எனினும் அந்த பையன் தன் பரம்பரை தொழிலை ஒழுங்காகச் செய்யவில்லை என்ற குற்றச்சாட்டு. மற்ற பிள்ளைகள் யாரும் அந்த தொழிலுக்கு வரவில்லை.
யாரும் இறந்து விட்டால் ஊர் ஊராக போய் துக்சச்செய்தியை உறவினர்களுக்கு சொல்லுவது, ஊர் கமிட்டி எடுக்கும் முடிவை பொதுமக்களுக்கு கொட்டு அடித்துச்சொல்லுவது எல்லாம் இந்த குடிமக்களின் வேலை தான். கொட்டு அடித்துக்கொண்டு வருபவர் நாளைக்கு ஊர்க்கூட்டம் என்பதை நாளைகழித்து கூட்டம் என்று சொல்லி முடிப்பார். ஊருக்குள் கொட்டு அடித்துக்கொண்டு குடிமகன் வரும்போது பெரிசு முதல் சிறியவர்கள் வரை என்ன செய்தி என்ன செய்தி என்று கேட்டு அவர் சொல்ல வந்த செய்தியை இவர்களே மாற்றி விடுவார்கள்.
இப்போது எங்கள் ஊர் எவ்வளவோ மாறிவிட்டது. ஆனால் இந்த குடிமகன்களை தான் ஊர்க்காரர்கள் மாறவிடுவதே இல்லை. இதற்கு பயந்து பலர் தூத்துக்குடி போன்ற நகரங்களுக்கு சென்று விட்டனர். மற்றும் பலர் பக்கத்து ஊர்களுக்குப் போய் மீன்பிடி தொழிலை செய்கிறார்கள். அடுத்த ஊரிலாவது இவர்கள் நாவிதன் பட்டம் இல்லாமல் வாழுகிறார்களா என்றால் அதுவும் இல்லை.
ஊரில் அடிமைகள் போய் வேலை செய்யும் இவர்களுக்கு குடிமகன்கள் என்று எங்கள் ஊரில் எப்படி அழைக்கிறார்கள் என்று நான் ஆச்சரியப்பட்டதுண்டு. காட்டுமிராண்டித்தனமாக அடித்தேன், பிடித்தேன் என்று செயல்படும் எங்கள் ஊர்களில் இவர்களால் எப்படி இவ்வளவு பயபக்தியாக செயல்பட முடிகிறது என்பது அதை விட எப்போதும் ஆச்சரியம் தரும் விசயம்.
புனித சவேரியார் காலத்தில் ( சுமார் 450 வருடங்களுக்கு முன்னர் )தங்களுக்கு ரொம்ப மரியாதை இருந்தது என்று பீரிஸ்பிள்ளை என் அப்பாவிடம் பெருமை பொங்க சொல்லுவதை கேட்டிருக்கிறேன். இப்போது குடிமக்களை யாரும் முடிவெட்ட தேடுவதில்லை. இழவு வீட்டில் மட்டும் இப்போது இவர்களுக்கு சிறிது கிராக்கி. அதுவும் அங்கு விரைவில் அண்டர்டேக்கர்கள் வந்து விடலாம்.
ஒரு சமூகத்தில் எல்லோரும் முன்னேற வேண்டும். ஆனால் அது நடக்கும் போது ஒரு நெரூடல் ஏற்படுவதும் இயற்க்கை தான். தமிழில் நாவிதன் என்றால் பக்கத்தில் இருப்பவன் என்று பொருள். மலையாளத்தில் கூட இவர்களை அடுத்தோன் என்று அழைக்கிறார்கள். எங்கள் ஊர்களில் இன்னும் ஒரு படி மேலே போய் குடிமகன் என்று அழைப்பதும் ஒரு கலாச்சாரத்தின் எச்சமோ என்னவோ

கசாப்புக்கடை

உள்ளே வெளியே…

தமிழக மக்கள் இந்த கோமாளி அரசியல்வாதிகளிடளிருந்து எப்படி தப்பிக்க போகிறார்கள் என்ன கவலையை இந்த பட்டாளி மக்கள் விவகாரம் மீண்டும் பெரிதாக்கி உள்ளது. உள்ளே வெளியே என்று இவர்கள் நடத்தும் நாடகத்திற்கு இந்த மக்கள் எத்தனை நாட்கள் ஏமாறப்போகிறார்கள்.

அரசியல் கட்சிகளின் நலன்கள் என்பது மக்களின் நலனா?. தங்களுடைய தனிப்பட்ட நலன்களுக்காக அரசியல் நடத்தும் இந்த கட்சிகள் மக்களுக்காகவே வாழ்பவர்கள் போல எப்படி பாசாங்கு செய்கிறார்கள் பாருங்கள்.

இப்போது திமுக கூட்டணியில் இருந்து வெளியேற்றப்பட்டதால் அல்லது வெளியேறியதால் அடுத்து இளிச்சவாய் தமிழர்களுக்கு என்ன பலன் கிடைக்கப்போகிறது. ஒருவர் தலையை வெட்டுவேன் என்று சொன்னாராம்… அவர் தலையை வெட்டுவேன் என்றால் என்ன, என் தலையை வெட்டுவேன் என்று சொன்னால் என்ன, எல்லாம் ஒன்று தானே என்று ஒருவர் ஆதங்கப்படுகிறார். தலையை வெட்டுவேன் என்று ஆறு மாதம் முன்னர் தானே சொன்னார், இப்போது சொல்லவில்லையே என்று ஒருவர் சப்பை கொட்டல்.

இந்த கசாப்புக்கடை வியாபாரத்தில் அப்பாவி தமிழ் ஆடுகள் எப்படி தப்பப்போகின்றன.? இந்த சாக்கடைகள் வேண்டாம், புதிதாக தண்ணீர் பாய்ச்சுங்கள் என்றால் அடுத்து காத்திருக்கும் புதிய அரசியல் கட்சிகள் யார் என்று பாருங்கள். வெட்கமய்யா வெட்கம். இந்த குட்டித்தலைவர்களை நினைத்தால் இன்னும் மனம் கலங்குகிறது

தமிழக அரசியல் தரம் தாழ்ந்தது தான். ஆனால் அதன் எதிர்காலம் இன்னும் தாழ்ந்து விடும் என்பதை யாரும் தடுக்க முடியாது போல?